Nyuma y’uko Ikipe ya RSSB Tigers BBC isoreje ku mwanya wa kane mu irushanwa mpuzamahanga rya “FIBA Intercontinental Cup 2026”, umukinnyi wayo Leonard Craig Randall II yashyizwe mu bakinnyi batanu beza b’irushanwa.
RSSB Tigers BBC ni imwe mu makipe yitabiriye irushanwa mpuzamigabane ryabereye mu Bushinwa, nyuma yo kuba iya mbere muri Afurika yegukanye Basketball Africa League (BAL 2026).
Muri iri rushanwa, Leonard Craig Randall II ni umwe mu bakinnyi Henry Mwinuka utoza RSSB Tigers BBC yifashishije amukuye muri APR BBC, akina imikino itatu.
Muri rusange yakinnye iminota 113, atsindamo amanota 77, byatumye agira impuzandego y’amanota 25,7 kuri buri mukino muri iri rushanwa. Si amanota gusa kuko yashoboraga gukora ‘rebounds’ 2,7, ndetse akaba yanatanga imipira itandatu ivamo andi manota.
Ishyirahamwe rya Basketball ku Isi (FIBA) ritegura iri rushanwa, ryamushyize mu bakinnyi batanu bitwaye neza kurusha abandi. Ari kumwe na Eric Dixon ukinira G-League wabaye umukinnyi mwiza mu irushanwa ryose (MVP).
Hari kandi Lester Quinones na we wa G-League, Francisco Caffaro wa Boca Junior na Jay Bruhnke wa Rytas Vilnius.
Leonard Craig Randall II yashyizwe muri iyi kipe, mu gihe ku wa Gatatu, tariki ya 30 Nzeri 2026, yongereye amasezerano muri APR BBC yari yamutije muri RSSB Tigers BBC.
Ni amasezerano y’imyaka ibiri yashyizeho umukono mu Ikipe y’Ingabo z’u Rwanda, akazagumana na bagenzi be bakomeye muri iyi kipe barimo Chingka Kennedy Garba, Hubert Sage Kwizera, Teafale Lenard Jr., Antino Jackson, Axel Mpoyo, Ntore Habimana n’abandi.